Agnieszka er fædd og uppalin í Póllandi. Hún er með BA. gráðu í uppeldisfræði og MA. gráðu í sögu. Hennar aðaláhugamál eru tungumál, sálfræði, tónlist og kvikmyndir. Agniezka eða Aga eins og við köllum hana á 5 ára stúlku sem er einnig Hjallastefnustúlka. Aga er að læra Íslensku og ætlar að vera í afleysingum í vetur.

Ásta Bjarney er kjarnastjórinn á Rauðakjarna en hún kemur til okkar frá Velli sem er líka Hjallastefnuskóli og má því segja að hún sé hokin af reynslu. Hún hefur alltaf verið með annan fótinn í barnastarfi allan sinn starfsframa. Ásta Bjarney fer um helgar í vöðlur og setur á sig kafaragleraugu og skoðar hvað er að finna í sjónum. Þegar hún rekst á slípuð glerbrot tekur hún þau heim og gerir úr þeim lampa.

Björn Húnbogi eða Húnbogi eins og hann er alltaf kallaður hefur áranlanga reynslu af leikskólastarfi og hefur þá aðallega starfað í 5 ára starfi með börnum. Hann er einstaklega ljúfur og þolinmóður að eðlisfari og er lengi hægt að leita að falskari söngvara. Hann er stúdent frá Frammhaldsskólanum á Laugum af náttúrufræðibraut. Ásamt vinnu á Akri stundar hann nám í Borgarholtsskóla í leikskólaliðanámi. Húnbogi hefur gaman af því að lesa bækur og lagði hann stund á gítarnám sem ungur drengur.

Bryndís kom til liðs við Akur eftir að hafa unnið á hjallastefnuleikskólanum Öskju í Reykjavík en lengst af starfaði hún á hjallastefnuleikskólanum Velli uppi á Ásbrú. Það má því með sanni segja að hún sé hokin af reynslu. Bryndís byrjaði að vinna á Velli árið 2008 og hefur dundað sér í háskólanámi með vinnu en hún er að læra uppeldisfræði með áherslu á kynjafræði. Bryndís er fæddur og uppalinn Njarðvíkingur og þegar hún er í stuði á hún það til að semja Njarðvískar sögur með áherslu á fuglalíf.

Ebba er lífsglöð og listræn. Hún hefur mikinn áhuga á allskyns tónlist og spilar á nokkur hljóðfæri.

Eiríka hefur margra ára reynslu af starfi með börnum og kemur til okkar hokin af reynslu frá vinum okkar í Garðaseli. Eiríka á þrjár dætur og átti eitt sinn páfagauk. Eiríku finnst skemmtilegast að baka pönnukökur á þrjár pönnur og er lunkin stærðfræðingur. Þegar Eiríka er ekki að sinna barnastarfi eða pönnukökubakstri finnst henni gaman að ganga um Njarðvík með hjólbörurnar sínar og taka upp rusl.

Elen Eik sér um síþrif á Akri. Hún gerir það af alúð og hefur hún ryksugu á bakinu og syngur Ghost busters á meðan hún ryksugar. Elen Eik smíðar litla báta í frítíma sínum úr spreki sem hún finnur þegar hún gengur upp á Keili. Hún gerir það sjaldan nú orðið en sprekhaugurinn var orðinn nógu góður til að endast í nokkur ár.

Erla okkar er þroskaþjálfi að mennt en það er ekki það eina sem hún gerir, hún er líka einstaklega flink að suma flíkur og vera brosmild og skemmtileg. Erla kemur til okkar frá hjallastefnuleikskólanum Velli þar sem hún starfaði um árabil bæði sem hópstjóri og sem kjarnastjóri. Hennar helstu áhugamál eru hestar, sléttir og mjúkir hælar og þorskar.

Eydís er leikskólakennari sem hóf Hjallastefnustarfsferilinn sinn á Velli. Hún starfaði í leikskólanum Hjalla í Hafnarfirði í 5 og hálft ár þangað til hún kom til okkar á Akur. Hennar helstu áhugamál eru dorgveiðar og harmonikkuspilun, hún hefur einnig gaman af því að fingraprjóna. Hún leiysir danskar morðgátur í frítíma sínum.

Guðbjörg er orðin Njarðvíkurmær en hún ólst upp í Kópavogi. Guðbjörg býr hér ásamt eiginmanni og tveir dásamlegum börnum sem bæði hafa verið á Akri. Guðbjörn hefur mikla reynslu af verslunarstörfum en ákvað að kominn væri tími til breytinga og fann sig svona líka vel í barnastarfi. Hennar helstu áhugamál eru útivera, barnastarf og gæðastundir með fjölskyldunni.

Guðrún Arndís, eða Gunna, er úr Reykjavík og hefur gaman af því að lesa sögur og horfa á skemmtilega þætti og bíómyndir. Hún er útskrifuð úr Húsmæðraskólanum í Reykjavík og kláraði leikskólaliðanám. Gunna leggur nú stund á nám í leikskólakennarafræðum í HÍ og uppáhaldsliturinn hennar er blár. Hún getur látið tungubroddinn snerta nefið og hreyft eyrun! Gunna vann í Hjallastefnuleikskólanum Hnoðraholti áður en hún flutti í Njarðvík ásamt syni sínum og sameinaðist okkur á Akri.

Guðrún er uppalin að mestu í Kópavogi en flutti hingað í Reykjanesbæ 2011. Hún er gift og á eina stúlku. Guðrún hefur áður starfað á leikskóla, þá í kópavogi og byrjaði hjá Akri haustið 2013. Áhugamálin Guðrúnar eru að njóta samverunnar með fjölskyldu og vinum, ferðalög, föndur og margt fleira.

Guðrún Lilja útskrifaðist sem leikskólakennari árið 2009 frá Háskóla Íslands. Hún á tvö börn og tvær kisur. Hún byrjaði "óvart" að vinna á leikskóla í Mosfellsbæ árið 2001 og eftir það var ekki aftur snúið að vinna með börnum. Hún hefur reynslu af Hjallastefnunni en hún vann á Leikskólanum Velli með námi frá 2008 og þar til 2012. Hún flutti síðan búferlum annað í þrjú ár og er nú komin aftur til Reykjanesbæjar og hefur unnið á Akri frá 2015. Hún útskrifaðist úr Diplomanámi á Meistarastigi árið 2018 í Jákvæðri Sálfræði og eru tilfinningar barna hennar hjartans mál.

Hver er þessi Guðrún Pálína spyrð þú? Svarið er einstaklega listrænn og skemmtilegur hópstjóri á Akri sem hefur unun af leiklist og söng. Guðrún Pálína er fædd og uppalin í Reykjanesbæ en hún á það til að ferðast austur og vera stúlkan sem starir á hafið.

Haflína Maja er fyrrum hjallastefnustúlka og eru gömlu kennararnir hennar hérna á Akri, Haflína er á útkallsvakt hér á Akri og stekkur inn í eldhús með bros á vör

Halla Björk kemur til okkar frá leikskólanum Barnabóli á Skagaströnd sem einnig er Hjallastefnuleikskóli. Hún er með stuðaralímmiða á hjólbörunum sínum sem stendur á ,,made in sveitin" og var alin upp af tveimur kindum. Í frítíma sínum safnar hún gorkúlum og þurrkar.

Halldóra er mikill gleðipinni sem hefur reynslu af leikskólastarfi en áður en hún kom til okkar á Akri var hún í starfi á heilsuleikskólanum Skógarási. Halldóra hefur einstakt lag á hestum og hefur gaman af sultugerð. Hún stundar kraftlyftingar í frítíma sínum en þá aðallega með fjörusteina.

Heike er þýsk að uppruna og hefur búið á Íslandi í tugi ára. Hún er gift, fjögurra barna móðir og á tvö barnabörn.Heike hefur mikla reynslu af starfi með börnum og vann sem dagmóðir í 11 ár. Heike veit fátt betra en að vera með fjölskyldunni og horfa á góða bíómynd Heike er mjög fróðleiksfús og kláraði leikskólaliðanám á Keili 2009. Hún á mörg hugamál, m.a.útilegur,ferðalög og eiga góðar stundir með vinum og fjölskyldunni. Heike er múlti-kjarnakona sem lauk einnig stuðningsfulltrúanámi haustið 2014 ásamt því að vera kórstjóri jóðlkórs Akurs.

Helga útskrifaðist sem þroskaþjálfi frá Þroskaþjálfaskóla Íslands árið 1994 og lauk viðbótarnámi fyrir þroskaþjálfa til B.A. gráðu frá HÍ árið 2009. Helga hefur starfað í leikskólum, í sumarbúðum og ýmsum öðrum stöðum. Áhugamál Helgu er tónlist, en hún spilar á fiðlu í Sinfóníuhljómsveit áhugamanna. Hún á tvö börn og hefur komist að því á síðustu misserum að prjónaskapur er henni í blóð borin og prjónar hún í frítíma sínum hverja flíkina á fætur annarri.

Íris Jóhanna er einn af reynsluboltunum sem vann á Velli um árabil, hún er búin að leggja lokahönd á grunnskólakennarafræðin í Háskóla Íslands. Íris er einstaklega flink í skipulagningu og skemmtunum ásamt því að vera söngelsk með meiru. Íris átti tvo drengi og tvo hunda.

Jóna Hrund er uppalinn í Kópavogi og hefur starfað í leikskóla frá 1998. Hún hefur starfað við Hjallastefnuna frá haustinu 2001. Hún útskrifaðist sem leikskólaliði sumarið 2008. Áhugamál Jónu eru fjölskyldan, ljósmyndun og ferðalög innanlands sem utan. Jóna er í gift og á tvö börn

Karólína er fædd og uppalin í Keflavík en bjó í Danmörku í 10 ár. Hún útskrifaðist sem grunnskólakennari frá Háskóla Íslands í júní 2011 síðan bætti hún við sig árið 2016 leikskólakennararéttindunum. Hún kom til starfa á Akri í september 2011 eftir að hafa starfað sem sjúkraliði á hjúkrunarheimili frá árinu 2006. Helstu áhugamál Karólínu eru útivera ferðalög og ýmiskonar handavinna en einnig eru uppeldis og menntamál henni mjög hugleikin. Hún er gift og á tvo uppkomna drengi.

Kolbjörn var meðstjórnandi í fjarveru Sigrúnar. Kolbjörn Ivan er alinn upp á Laugum í Reykjadal og vann á Hjallastefnuleikskólanum Hólmasól á Akureyri um árabil. Hann lærði heimspeki í Hákskóla Íslands með áherslu á heimspekilegt starf með börnum. Lýðræði í barnastarfi er honum hjartans mál og einbeitti hann sér að heimspekilegum samræðum við börn í lokaverkefninu sínu til M.Ed. Kolbjörn útskrifaðist sem leikskólakennari árið 2019. Kolbjörn sinnir tónlistasmiðju Akurs og sér til þess að allir kjarnar í húsi hafi aðgang að dásamlegri tónlist. Helstu áhugamál Kolbjörns eru bókalestur og át.

Linda er í fæðingarorlofi. Linda okkar er aðstoðarhópstjóri á Gulakjarna, hún vinnur eftir hádegi. Linda kom til okkar þegar henni langaði að prófa að vinna á leikskóla og viti menn það gekk svona líka dásamlega. Linda hefur gaman af því að vera í góðra vina hópi, hlusta á tónlist og veiða fisk í frítíma sínum

Malwina okkar er sólargeisli sem brosar svo fallega. Henni finnst gaman að ferðast og hefur mikinn áhuga á bakstri. Þegar hún bakar þá er það athöfn sem fjölskyldan tekur öll þátt í. Hún á eina dóttur sem er Akurstúlka og gifti sig á síðasta ári. Hún hefur svo gaman af því að vinna á leikskóla að hún segir að þegar hún mætir á morgnana þá allt í einu er hún að fara heim í lok dags.

Margret Jóna kemur til okkar frá Velli þar sem hún hefur unnið með yngstu börnunum síðast liðin ár. Hún ákvað að færa sig yfir á Akur til þess að geta gengið í vinnuna en henni finnst það vera svo dásamlega skemmtilegt. Hún spilar á munnhörpu og er margfaldur meistari í stígvélakasti. Hún ætlar að taka þátt í jóðlkór Akurs en hún er fyrsti sópran.

Marta kom til okkar á Akur í árabát, fyrir það hafði hún ráfað stefnulaust um en fann sig loksins þegar hún kom til okkar. Það sem við erum heppin að hún fann okkur!

Natalia er enskukennari Hjallastefnunnar á Suðurnesjunum, hún er menntaður kennari og eru hennar helstu áhugamál tungumál. Hún hefur einnig einstaklega gaman af því að hjóla. Natalía ferðast á milli skólanna Sólborg, Völlur, Gimli og Akur. Natalía er nýbúi á Íslandi og er að læra Íslensku meðfram vinnu.

RÍÓ eins og hún er alltaf kölluð vann á Tjarnaseli í Keflavík áður en hún kom til okkar á Akur, hún hefur einstaklega mikinn áhuga á nashhyrningum og öllu sem að nashyrningum kemur. það kemst fátt annað að hjá henni en nashyrningar, fyrir utan gæðastarf með börnum. Þegar hún verður stór þá ætlar hún að vera nashyrningur.

Sirrý okkar er stoða og stytta Akurs, hún eldar handa okkur svona líka dásamlegan mat og gerir allt frá grunni. Hún ákvað að bæta enn betur við og lærði súrdeigsbrauðsgerð og hefur bætt því við á matseðilinn hjá okkur. Sirrý er ekki bara töfrakonan í eldhúsinu hún er einnig sérstakur stílisti Akurs og kennir skólastjórnendum hvernig best sé að haga skrifstofu og svo lengi mætti telja. Sirrý er einnig meðlimur í garðyrkjufélagi Íslands og stendur fyrir skógrækt á Akri. Akur datt sko í lukkupottinn þegar Sirrý mætti á svæðið.

Sigrún Gyða er alin upp á Laugum í Reykjadal fyrir norðan og finnur hún mikla tengingu við Norðan fólkið í Game of Thrones. Sigrún er komin af kennurum en báðir foreldrar hennar eru kennarar. Sigrún byrjaði að vinna í Hjallastefnunni sem liðvettlingur frá 13 ára aldri og hefur verið viðloðandi við stefnuna síðan. Sigrún hefur unnið á Ásum í Garðabæ, Hjalla í Hafnarfirði, Velli á Ásbrú, Sólborg í Sandgerði en ákvað að setjast að og skjóta rótum á Akri. Sigrún er Þroskaþjálfi í grunninn og nam M.Ed í menntunarfræðum leikskóla og skartar því starfsheitinu leikskólakennari. Í námi voru hennar helstu áherslur; námssamfélag fyrir alla og vinna með einhverfum börnum. Helstu áhugamál Sigrúnar eru leirkerarennsla, sjósund, frjálsar íþrótti, stangveiði, hjólreiðar, sjónvarpsáhorf, nammiát, hollusta, freiðibað, stígvélakast, kanínuræktun, staðfesta, leikskóladagatalagerð og skýrslugerð, svo fátt eitt sé nefnt.

Sigurður eða Siggi eins og hann er gjarnan kallaður kemur til okkar frá Garði, hann hefur mikla reynslu af frístundastarfi og umhirðu golfvalla. Hans helstu áhugamál eru golf, fótbolti og sund. Hann útskrifaðist úr Fjölbrautaskóla Suðurnesja 2014. Hann veit fátt fallegra en að sjá vaskan golfara slá fyrsta högg á fyrsta teig í morgunsólinni. Sigurður er sjómaður, sannur Reykjanesbæingur, alltaf fer hann upplagður út að skemmta sér.

Sóley hefur unnið á Akri með hléum síðan hún sleit barnaskónum. Hún ferðaðist um tíma með frystitogara um strandir Afríku þar sem hún fékk sér tattoo með blómi úr flóru Íslands í hverri höfn. Hún hefur dálæti af því að klappa kattardýrum, sér í lagi blettatígrum. Sóley er strangættuð af norðausturlandi og unir sér vel í löngum rútuferðum. Þegar Sóley er beðin um að lýsa sjálfri sér þá brestur hún í söng og valhoppar af vettvangi. Sóley stundar einnig nám í leikskólakennarafræðum við Háskólann á Akureyri.

Þegar við fundum Thelmu þá var hún berfætt með berjaling á milli tánna, hún hefur nefninlega svo mikinn og ákafann áhuga á náttúrunni. Milli þess sem hún faðmar tré og plöntur þá safnar hún fjögurra blaða smárum og trjádrumbum. Thelma stundar skák og forritun í frítíma sínum.

Vilborg er búsett í Garði ásamt unnusta sínum og dóttur. Hún hefur mikinn áhuga á hrossarækt en sökum ofnæmis og ofsahræðslu ákvað hún að fara aðra leið í lífinu. Þar duttum við í lukkupottinn en Vilborg er einstaklega hæfileikarík í framleiðslu á hvalahljóðum sem hún tekur upp í heimastúdíóinu sínu á fullu tungli.

Þórarinn Jökull hefur starfað á leikskólanum Aðalþingi í Reykjavík. Hann er mikill dýravinur og hefur sérlega gaman af fluguhnýtingum og harðfiskgerð.

Þórhildur hefur mikinn áhuga á súrdeigsbakstri, listsköpun og grefur hún lax í frítíma sínum.